jueves, 19 de mayo de 2011

Gochificacion [Cerdificación / Swinification]

Cuando usté tea liendo estes linies, los bares españoles ya tendrán sufrío un cambiu monumental. Nun habrá xente fumando nellos. Los fumadores, que son obviamente mayoría en cualquier bar, van tener la oportunidá de refrescase y salir a fumar a la puerta. O tovía meyor, quedar en casa y fumar ellí lo que is pareza. Ye una midida hixenista que xustifiquen el Gobiernu y les organizaciones antifumo dando cifres del númberu de muertos pol fumo, los cánceres qu’ello produz, l’ataque a los non fumadores que l’aborronar supón, el peligru pa los trabayadores de la hostelería, l’aforru que ello supondrá a les arques del Estao.
Al parecer, eliminau tan tremendu riesgu, los españoles vamos morrer d’otra cosa. Morrerán unos arreventaos ente fierros de coches ricamente subvencionaos pol Estao, espertu en sacar perres a los probes pa dailes a los ricos. Morrerán otros faciendo deporte promocionau pol ministeriu del asuntu. Palmarán-la otros en residencies de vieyos  onde siempre habrá dalgún alma caritatible que i ofreza a ún un vasu de llixía.
Matarán-se los mozos fartos de vivir nun universu hiperreglamentau onde les decisiones individuales son suplantades por una camaretada de riques muñeques apalancades nel Ministeriu de Sanidá. Ye el mesmu Gobiernu que vende armes a mediu mundu, el que tá en guerra n’Afganistán, el que mantién na miseria
a los saharauis de Tinduf y a los campesinos del Rif, el que apoya toles guerres de la droga que hai nesti planeta: esti gobiernu ilustrao que i enchufa miles de millones a la iglesia católica, que cabildea a favor de gobiernos estranxeros, que i encanta aconceyase con mandamases. Esos a los que los impuestos especiales nun is afeuten podrán tovía tomar decisiones sobre la so salú, fumar nos sos clubs privaos el caru tabaco, convertío ya en dalgo esclusivamente pa ricos: un toque de distincion. Si usté ye probe, nun lo va a poder consumir. Y si insiste en facelo, nun va poder comer.
Y ye que siempre hubo clases. Pero aprendieren-nos que había clases altes y baxes, aristocracies y plebe,
oligarquíes y proletariao. Anque depués cuntaren-nos que ya nun les había, que yéramos todos clas medio, y que todos teníamos drechu a tener un xalé y un BMV y un perru. Y llenó-se el país d’urbanizaciones y de carísimes autopistes pa poder dir a gusto coles últimes fotingues. Y depués determinanon que nos diben reordenar, que díbamos llevar vida sano, que nos queríen supermanes. Y decidienon-nos la dieta. Y cuando mediu país suañaba con un paraísu suburbano de barbacoa y mascotes, resultó que les mascotes yeren ellos. Les idees polítiques avancen que ye una barbaridá, y si l’ideal del PSOE de Pablo Iglesias yera una sociedá d’homes llibres y iguales, el ciudadán ideal del socialismu del sieglu XXI ye un gochu. Capau y alambrau,
confinau na so corripa, el ciudadanu bracu ve cómo les sos emociones y vivencies les remana una casta de monos criminales cola verdá científica por bandera. El monu de bata blanca que nun alcontraba problemes pa la salú na deportación de dos millones de kosovares ye el más enfotau na nuesa gochificacion. Será porque él lleva la llama nel nome y quier que todos teamos nes mesmes.
Y nestes llegó Wikileaks y pon a secar la colada de los simios criminales. El cinismu, el doble llinguaxe, el sirvilismu delantre el poder imperial americanu, les pleitesíes al rei de Marruecos, la tomadura de pelo xeneral que representa esi universu lacayo, circustancies diestramente escaxinades nuna memorable riestra son el meyor retratu del mundu: un llugar siniestru onde los seres humanos son mascotes marionetes de bandes criminales que monopolicen pa ellos los placeres del mundu y que s’enfoten en nun permitiilos a usté: un
cáncer social que s’enseñoria de la vida de los homes y los reduz a una animalidá perruno, de regles indiscutibles y arbitraries que lo mesmo te capen que t’alambren. Un calderau d’esllava que t’aventen a la cara.
Un horror si nun yes un gochu.

Madrid, diciembre del 2010

No hay comentarios:

Publicar un comentario